Mga bayot gi-ban sa Santacruzan

CEBU, Philippines – Gipahimangnoan sa Cebu City Anti-Indecency Board (CAIB) ang mga mahuyang sa siyudad nga dili mopahigayon og mga kalihukan sa dakbayan sama sa Santacruzan.

Kini tungod kay ang Santacruzan giingong usa ka relihiyosong kalihukan niining buwan sa Mayo nga alang ra sa kababayen-an ug kabataan.

Ang chairman sa CAIB nga si Dr. Rene Josef Bullecer nihimo sa pahimangno human makadawat og taho nga duna nay gipahigayong Gay Santacruzan sa laing dapit.

Gani usa ka kanhi sikat nga aktor nga niladlad na sa iyang kapa ang gikataho nga niapil sa nahisgutang matang sa kalihukan didto sa kauluhan.

Matud pa ni Bullecer nga ang Santacruzan mao ang pag-ila sa kadaugan sa Krus ug dili angayang yaga-yagaan.

 “Let’s make it clear nga kanang Santacruzan is a religious thing, purely religious, ikaduha, dili gyud na pwede sagulan og bugal-bugal, ikatulo, para ra gyud na sa kababayen-an ug kabataan,” sumala pa ni Bullecer.

Ang chairman sa CAIB mipadala na og suwat-pahinumdom ngadto sa nagkadaiyang mga parokya sa Sugbu nga dili tugutang makaapil ang mga bayot sa Santacruzan.

Usa ka mahuyang nga drama talent ug radio anchor sa usa ka inilang sibyaanan sa dakbayan ang hugtanong nipaluyo sa lakang ni Bullecer.

Ang mahuyang nga dili gustong magpahingalan midason sa argumento sa CAIB chairman nga usa ka pagbugal-bugal ang pagpahigayon og Gay Santacruzan.

“While it is true nga we are in a democratic country but by organizing or joining a Gay Santacruzan, for me, it is going beyond the limits,” sumala sa tinubdan.

Wala hinuon maklaro gikan kang Bullecer kung kalapasan ba sa ilang gipatuman nga Anti-Indecency Ordinance sa siyudad ang pagpahigayon og Gay Santacruzan.

Apan una nang gi-ban sa CAIB dinhi sa dakbayan ang pagpahigayon og Macho Gay ug Miss Gay subay usab sa pag-implimintar niini sa City Ordinance 1408. - Elly Bolonos (BANAT NEWS)