CEBU, Philippines – Nagpadayon karon ang gihimong pagpangandam sa Cebu City Schools Division alang sa gitakdang pagbukas sa klase sa tibuok kapupud-an karong Hunyo 1.
Kini bisan pa man kung adunay mga hugon-hugon nga posibleng mairog ang nahisgutang schedule tungod usab sa hulga sa swine flu.
Ang Department of Education (DepEd) gikataho hinoon nga nag-agad lang sa advisory gikan sa Department of Health (DOH) kung iirog ang gitakdang pagbukas sa klase.
Apan matud ni City Schools Division Superintendent Doctor Lorna Rances nga samtang wala pay bag-ong kalamboan, magpadayon usab ang ilang gihimo nga pagpangandam.
Gani nanawagan na ang City Schools Division Superintendent ngadto sa mga ginikanan nga mosalmot sa gitakdang usa ka semana nga Brigada Eskwela.
Kini dungan nga ipahigayon sa tibuok nasud sugod karong Mayo 18 hangtud na sa Mayo 22 agi usab og pag-andam sa mga tunghaan alang sa pagbukas sa klase.
Lakip sa mga buhaton atol sa Brigada Eskwela mao ang paglimpyo sa mga tunghaan, pag-repair sa gubaong mga lingkuranan, lamesa ug uban pa.
Matud ni Rances nga ang maong kalihukan gitumong aron dili na mupalta ang mga tinun-an sa unang adlaw sa klase nga maoy sagad himoon niini matag tuig-tingtungha.
Dul-an sa 150 mil ka mga tinun-an sa public elementary ug high school sa dakbayan ang gipaabot ni Rances nga motungha sugod karong sunod buwan.
Gipadayag hinoon niya nga andam na ang security measures nga ipatuman sa nagkadaiyang tunghaan. – BANAT NEWS