CEBU, Philippines – Ang duha ka buhatan sa Comelec sa siyudad sa Sugbu mangayo sa kagamhanan sa dakbayan og tabang alang sa gikinahanglan nilang dugang nga “data capturing machine”.
Kini tungod kay upat lang ka computer ang gigamit sa Comelec karon sa nagpadayong rehistrasyon sa mga botante hinungdan nga limitado lang ang marehistro niini matag adlaw.
Gani ang Comelec sa habagatang distrito sa siyudad wala mopahigayon og satellite registration tungod sa ubay-ubay nga mga bag-ong botante ang moduaw sa maong buhatan nga dili matagad.
Maoy hinungdan, matud ni City North District Election Officer Attorney Marchel Sarno ug City South District Election Office Attorney Edwin Cadungog nga nagplano silang mohangyo sa syudad alang ning maong mga panginahanglan.
Kini tungod kay mipagawas og guidelines ang Comelec-Manila nga nagtugot sa ilang mga local nga buhatan sa pagpangayo og tabang ngadto sa lokal nga kagamhanan alang sa maong katuyoan.
Nagkanayon si Sarno nga kun mahimo nang unom ang data capturing machine sa duha ka buhatan sa Comelec sa dakbayan, tataw kaayo nga dili malangay ang rehistrasyon sa mga bag-ong botante.
Hinuon sa bahin ni acting mayor Michael Rama sa dakbayan sa Sugbo nagkanayon kini nga suwat- hangyo nalay gipaabot niya gikan sa Comelec alang niining mga butanga. – BANAT NEWS