Duha ka batan-on nangilog og armas

CEBU, Philippines – Duha ka minor de edad ang gidakop sa kapolisan human pasanginling nangilog sa armas sa usa ka gwardiya diha sa Pajo National Highway kagahapon sa kaadlawon.

Ang nasikop mao ang duha ka 17-anyos nga lalaki nga mga residente sa sitio New Paradise ug sitio Seaside pulos sa barangay Pajo dakbayan sa Lapulapu.

Samtang ang nakuhaan sa iyang armas mao si Calip Albrando Potot, 45, sakop sa Blue Breed Security Agency nga nadestino sa Lilang Guitar sa Pajo National Highway dakbayan sa Lapulapu.

Matud pa ni Potot mga alas 12:40 kagahapon sa kaadlawon samtang naglingkod siya sa iyang pwesto kalit miabot ang duha ug mition og armas dayon gikuha ang iyang service firearm nga kalibre .38.

Human mitaho si Potot sa kapolisan dali nga miresponde ang mga sakop sa Crime Against Property pinangulohan ni SPO1 Danilo Aying ug gisubay ang sitio Seaside sa barangay Pajo ug diha nila masigpati ang duha ug gidakop. Atol sa pagrekisa, nakuha kanila ang tulo ka mga armas lakip na ang armas ni Potot hinungdan nga gidala kini sa detention cell sa kapolisan. - Bong Soriano (BANAT NEWS)