Leader sa 'kulto' gipasakaan og kaso

CEBU, Philippines – Gipasakaan og kaso ang leader sa usa ka kulto sa dakbayan sa Lapulapu human gitumbok nga nakighilawas sa mga minor de edad bugti sa ilang kaluwasan sa Diyos.

Matud pa ni SPO3 Editha Patalinjug sa Womens Desk sa kapolisan sa dakbayan sa Lapulapu duna nay mga pamahayag nga giluwatan ang mga kihante batok ni Sulpicio Daño alyas Noy Pisyong nga gitawag nilang “Daddy Divine.”

Kasong kalapasan sa Akta Republika 9208 ubos sa Sec. 4 sa paragraph (a) kon trafficking in person ug paglambigit niini ngadto sa bisan unsang matang sa pakighilawas kon sexual activities.

Matud pa ni SPO3 Patalinjug, wala moatubang sa piskalya ang suspek gumikan kay gidala kini sa tambalanan gumikan sa gipamating sakit sa kalawasan, pagtaas sa iyang presyon ug sugar count tungod sa iyang sakit nga diabetes human madakpi niadtong Biyernes.

Si Daño gireklamo sa duha ka menor de edad nga giingong nakaeskapo gikan sa ilang kulto sa milabay’ng semana ug mitaho ngadto sa mga sakop sa DSWD-7 ug sa International Justice Mission kon IJM uban sa mga ginikanan sa duha ka bata.

Gumikan niini gironda sa kapolisan ang panimalay ni Daño sa barangay Agus ug gidakop kini, si Daño kusganon hinuong mihimakak sa mga alegasyon batok kaniya. - Bong Soriano (BANAT NEWS)