CEBU, Philippines – Padayong naapektahan ang mga manindahay og karneng baboy sa kamerkaduhan sa dakbayan sa Sugbu ilabi na sa Carbon Public Market human mogawas ang taho labot sa swine flu.
Kini maoy giangkon ni Erwin Goc-ong, ang adviser sa Cebu Market Vendors Development Cooperative (Cemvedco) bisan pa man kung giusab na ang pangalan niini.
Ang swine flu virus nga nikalas na og ubay-ubay’ng kinabuhi sa nagkadaiyang mga nasud partikular na sa Mexico ginganlan na karon og Influenza A H1N1 virus.
Nagtuo si Goc-ong nga ang padayong paghisgot sa media matag adlaw sa nahisgutang virus nakatampo sa kabalaka sa mga konsumidor pagpalit og karneng baboy.
“Although dili ta kabasol sa media pero ang pagsige og balik-balik niini og balita matag adlaw nakaapekto gyud sa halin sa karneng baboy,” sumala ni Goc-ong.
Una nang gikataho nga ang A H1N1 virus nagagikan sa baboy ug mitakod sa tawo nga niresulta usab sa giingong human-to-human transmission, butang nga gisalikway dayon sa World Health Organization ug sa Department of Health.
Wala na hinuon masurpresa si Goc-ong nga niminos ang halin sa mga meat vendors niining higayuna tungod kay kini ilang gipaabot panahon sa bakasyon.
Nasayran nga sa nangaging mga bakasyon ang Cemvedco moihaw og labing minos 150 ka baboy, mas ubos sa 250 ka baboy sa regular nga mga semana kung dunay klase.
Apan sa miaging pipila ka semana niingon si Goc-ong nga 80 na lang ka baboy ang ilang naihaw ug kini giingong gikabalaka sa mga meat vendors.
Subling gipahibawo sa adviser sa Cemvedco ngadto sa publiko nga limpyo ug luwas gikan sa gikahadlukang virus ang ilang mga baligyang karne sa kamerkaduhan tungod kay dili chilled ug labaw nang dili imported ug pulos lang locally slaughtered ang mga baboy dinhi. – BANAT NEWS