Suspek sa shabu laboratory kasilotan gyud

CEBU, Philippines -  Masaligon si Under-secretary Atty. Clarence Paul Oaminal sa Dangerous Drugs Boards (DDB) nga mulampos ang gobiyerno sa pagpahamtang og bug-at nga silot sa 14 ka mga akusado sa Mega Shabu Laboratory (MSL) nga gironda sa mga ortoridad sa dakbayan sa Mandaue niadtong tuig 2004.

Gibutyag ni Usec. Oaminal sa Banat News, dili tinuod ang pangagpas sa kadaghanan nga maabsuwelto ang kaso nga giatubang sa mga suspetsado nga nagpadagan sa maong laboratoryo.

Sayo niini giingong usa sa mga suspetsado sa maong kaso kinsa nagtingkagol karon sa prisohan sa Mandaue , giingong nagsaulog na sa taliabot niyang kagawasan.

Kini pinaagi sa pagbangka niini og litson nga gipakaon niya ngadto sa mga kauban niyang piniriso kay sa dili madugay makalingkawas na kuno siya gikan sa bilanggoan.

Apan matud pa ni Usec. Oaminal nga puwerting dimalasa ning prisoha kay klaro kaayo nga gilingla lang sila sa ilang abogado kay imbis sultihan sila nga madubok na sila sa prisohan, gipatuo hinuon nga makagawas sila ug dili kasilotan.

Sumala pa ni Oaminal nga naduso na sa prosecution ang ilang tanang mga ibendinsya nga bug-at kaayo batok sa mga akusado ug ang gihimo karon sa depensa, usa nalang ka paglangay-langay sa kaso.

Gibutyag sa luyoluyong kalihim sa DDB nga ipadayon ang pagbista sa maong kaso karong Hunyo ug ang depensa mao nay moduso sa ilang mga ebidensya sa maong higayon .

Nagtuo si Usec Oaminal nga wala pay Disyembre karong tuiga aduna nay desisyon ang korte batok sa mga akusado ug kumpiyansa siya nga makonbikto gyud ang mga sinumbong.

“Puwerting klaroha nga gilingla lang sila  sa ilang mga abogado kay bisan lang sa analogy, ang usa ka tawong makuhaan lang og bisan sama kagamay sa muta nga shabu makonbikto man gani, kana pa hinuong tinonilada na nga shabu, unya maabsuwelto sila?” sumala pa ni Oaminal. – BANAT NEWS