Cuenco mihatag og school bus sa Tisa

CEBU, Philippines -  Pormal nang gitugyan ni South District Rep. Antonio Cuenco kagahapon ang usa ka school bus alang sa mga tinun-ang taga barangay Tisa nga makasakay nga libre.

Ang bag-ong school bus gitugyan ngadto kang Tisa barangay captain Eduardo Cabulao nga tuyong gipalit alang sa mga nagtunghang mga estudyante sa barangay atol sa subling pagbukas sa klase karung bulan sa Hunyo.

Si Cuenco dihang nahinabi sa Banat News mibutyag nga nagkantidad kini ogP800 mil pesos nga gikan sa iyang countrywide development fund, ang matag barangay sa South District gihatagan og tag P800 mil pesos alang sa ilang mga proyekto.

Matud pa ni Cuenco gipapili niya ang matag barangay nga iyang gihatagan og P800 mil pesos kun unsa ang ilang gustong paliton niini gikan sa school bus, garbage truck, fire truck, patrol car o ambulance car depende sa panginahanglan sa mga opisyal sa barangay.

Ang Tisa mipili sa school bus ug mao pa kini ang unang barangay nga nakapahimulos sa iyang CDF karung tuiga.

Si kapitan Cabulao sa iyang bahin mihangop sa maong gahin nga gihatag kanila sa kongresista nga nakatabang og daku sa ilang barangay ilabina sa pagtabang nga makatungha ang mga tinun-an nga kabus nga makasakay na nga libre atol sa subling pagbukas sa klase karung Hunyo. – BANAT NEWS

Show comments