CEBU, Philippines - Dead-on-arrival sa Balamban District Hospital ang usa ka appliance technician human gipauwana’g bala sa tulo ka mga armadong nag-bonnet sakay og motorsiklo niadtong Sabado sa gabii diha sa barangay Sto. Niño dakbayan sa Toledo.
Ang namatay giilang si Daniel Olasiman, 33, kinsa usa usab ka dispatcher og traysikad.
PO2 Dante Hilo sa Toledo Police Station nga gikahinabi sa Banat News nagkanayon nga nagbarog si Olasiman daplin sa dalan duol sa waiting shed dihang kalit nga nibutho ang tulo ka suspetsadong nagsakay og motorsiklong kolor blue ug kalit gipusil sa duha ang biktima ginamit ang kalibre .45 ug daling nangikyas paingon sa direksyon sa Balamban.
Si PO3 Thule Tahadlangit imbestigador sa Toledo Police Station nga naghupot sa maong kaso mibutyag sa Banat News nga wala pa nila masuta kun unsay motibo sa krimen.
Lima ka mga samad pinusilan sa lawas ang naangkon sa biktima, samtang nakuha sa crime scene ang pito ka kabhang sa .45 ug unom ka mga deform slugs. – BANAT NEWS