Mabulukong pagsugat kang Tomas himuon sa mga senior citizen

CEBU, Philippines -  Isugyot sa kapunungan sa mga senior citizen sa siyudad sa Sugbu nga hatagan og mabulukong pag-welcome si Mayor-on-leave Tomas Osmeña atol sa gitakdang pagbalik niini dinhi sa dakbayan niining buwana.

Ang national president sa Federation of Senior Citizens Associations of the Philippines (FSCAP) ug barangay kapitan sa Labangon nga si Felix Abella masaligong suportahan sa mga senior citizen ang iyang sugyot.   

Ang mayor bag-uhay lang mi-apud-apod og tag-P2 mil nga financial assistance sa maong sektor dinhi sa siyudad.

Gipadayag ni Abella nga kung gisugat ang mayor og mainitong paghangop sa pagpauli niini niadtong buwan sa Marso walay rason nga kini dili mabuhat karon.

Wala pa hinuon matino kung kanus-a ang tukmang adlaw nga mahibalik si Osmeña dinhi sa dakbayan ug subling moasumir sa gibiyaan niyang katungdanan.

Apan matud ni Bise Mayor Michael Rama nga labing siguro nga niining buwana makapauli na ang mayor human sa malampusong operasyon sa urinary bladder niini didto sa Estados Unidos.

Walay supak ang acting mayor (Rama) sa sugyot ni Abella nga hatagan og mabulukong pagsugat ang mayor apan gikinahanglan nga pahibaw-on una ang mayor sa himoon nilang lakang aron kini dili makalitan.

Gitahasan ni Rama nga makig-alayon ngadto kang Osmeña mao si City Administrator Francisco “Bimbo” Fernandez nga usa usab sa mga sinaligan sa mayor.  – BANAT NEWS