Way 'overpricing' sa laptops - Artajo

CEBU, Philippines – Wala ikahimuot sa labaw sa Management Information and Computer Services (MICS) sa Cebu City Hall ang gisuwat sa usa ka kolumnista sa Banat News kabahin sa kontrobersya sa planong pagpalit og mga laptop sa city hall aron ihatag sa mga huwes.

Wala mahimuot si Engineer William Artajo sa gisuwat nga lindog ni Fred Languido sa “Lintunganay” nga migula niadtong Mayo 8 ning tuiga tungod kay daw gipagawas niini nga iyang gipaburot ang presyo sa palitunong mga laptop computers sa kagamhanan sa dakbayan.

Gipasabot ni Artajo nga walay nahitabong overpricing o bisan unsang pagpaburot sa presyo tungod kay giingong walay transaksyon nga natigayon.

Buot karon ni Artajo nga mangayo kaniya og pasaylo si Languido ang iyang dungog pinaagi sa mga pulong nga gitagik niini, ug kini nidemanda ug pasaylo gikan sa kolumnista.

“He has to apologize because those statements are very damaging, it’s really abusive, he has to apologize and correct it kay nalain gyud ko ato nga pagkasuwat,” sumala ni Artajo.

Matud pa ni Artajo kung magdumili pagpangayo kaniya og pasaylo si Languido, kini iya unya nga ireklamo.

“If he will not apologize to me and correct his article, I will basically do something gyud, I will put this in a proper venue,” nagkanayon si Artajo.

Una nang giangkon ni Artajo sa hawanan sa City Council nga ang iyang buhatan maoy nihimo sa specifications pagpalit og 24 ka mga laptop computer.

Tag-P80 mil ang presyo sa matag usa ka laptop hinungdan nga kini gikwestyon ni Konsehal Rodrigo Abellanosa tungod sa giingong kadako ra sa maong kantidad.

Kini usab ang gihimong sukaranan ni Languido sa pagsuwat sa iyang opinyon kabahin sa presyo sa mga laptop computer, ang kolumnista mipadayag nga wala siya’y angayang pangayoan og pasaylo tungod kay walay malisya sa iyang gisuwat nga opinyon.

Midugang si Languido nga katungod ni Artajo ang pagdangop ngadto sa tukmang lugar ug kini andam niyang atubangon.

“Dili na lang ko mohatag og dugang statement, I will just answer the charges in a proper forum,” maisugong pamahayag ni Languido.

Ang resolusyon alang niini gipatun-an karon sa Committee on Information Technology sa City Council human mitumaw ang kontrobersiya. – BANAT NEWS