Compost pit sa eskuylahan gipadako ra nga isyu

CEBU, Philippines – Dismayado ang principal sa Don Vicente Rama Memorial National High School sa barangay Basak San Nicolas tungod sa giingong gipadako nga isyu diha sa ilang tunghaan.

Kini may kalabutan sa kontrobersyal nga compost pit nga gipakawot ni Nympha Balili nga gipatabunan ra usab ni acting mayor Michael Rama nga gidudahang ang katuyoan mao ang treasure hunting.

Nitumaw ang mga pagduda nga dunay treasure hunting nga gipahigayon diha sa maong tunghaan tungod usab sa ka lawom sa gikawot nga lungag nga moabot sa 20 ka tiil.

Kini ang hinungdan nga gipatabunan ni Rama ang lungag tungod sa iyang kabalaka nga dunay mahulog ug madisgrasya niini nga tinun-an.

Apan matud ni Balili nga dili angayang padak-on ang maong isyu tungod kay giingong wala sila’y laing tuyo sa pagkawot sa lungag.

“Nganong padak-on man na nga para ra man gyud na sa among mga basura diri sa tunghaan, wala man mi laing tuyo ana diha,” sumala ni Balili.

Apan si Cebu City Schools Division Superintendent Doctor Lorna Rances mopaimbestigar na sa maong kontrobersiya.

Gimanduan na ni Rances si division’s physical facilities coordinator, Rey Llanete, paghimo og pakisusi ingon man sa pagduso og rekomendasyon.

Gipadayag ni Rances nga mag-atubang unya og silot si Balili kung masutang dunay nahimong kalapasan sa ilang regulasyon.

Una nang gipadayag ni Konsehal Nestor Archival nga ang tukma sa usa ka compost pit magsukod lang og 1X5 meters ug unom ka tiil lang usab ang gilawmon. Gipasabot hinuon ni Balili nga mokabat sa 30 ka sako ang ilang mahipos nga basura matag adlaw ug dali ra nga mapuno kung mabaw ang himoong compost pit. - Elly Bolonos (BANAT NEWS)