40 ra ka kawani sa Tudela ang nasuholan

CEBU, Philippines – Nakadawat na ang mga kawani lakip na ang mga opisyales sa lungsod sa Tudela sa isla sa Camotes sa ilang upat ka bulan nga suhulan kagahapong adlawa. Apan walay labot niini ang mga kawani ni Mayor Rogelio Baquerfo.

Si Provincial Treasurer, Atty. Roy Salubre uban ni Emmanuel Gial mihatud sa suhulan sa mga kawani ug mga opisyales diha sa buhatan ni Vice Mayor Clent Maratas ug ubang mga miyembro sa konseho sa maong lungsod.

Apan matud pa ni Salubre kapin lang sa 40 ka mga regular employees sa maong lungsod nga sagad mga tawo ni Mayor Demitrio Granada maoy nahatagan tungod kay napakyas si Baquerfo sa pagsumiter og payroll alang sa iyang mga kawani.

Ang lalawigan mipagawas og P1.8 milyones gikan sa panudlanan sa probinsiya sa Sugbu subay sa kamandoan ni Gov. Gwendolyn Garcia aron may magamit ang pamilya sa mga kawani nga upat na ka bulang walay suweldo tungod sa panagsungi kun si kinsa nila ni Mayor Granada ug Baquerfo maoy tinuoray nga mayor sa maong lungsod.

Apan gitataw niini nga ang maong kantidad mauli ra sa panudlanan sa probinsiya kay bayran ra kini sa lungsod sa Tudela sa higayon nga mahulipan ang municipal treasurer nga si Angelita Roble.

Nagkaproblema ang panudlanan sa maong lungsod gumikan kay dili motugot ang Land Bank of the Philippines pagpagawas sa pundo sa lungsod tungod kay si Baquerfo man ang papirmahon ug dili ang gobernadora sigon sa napirmahan nga kasabutan niadtong nakalabay nga tuig. Si Baquerfo sa sayo pa miingon nga dili gyud niya pirmahan pagpagawas sa pundo kung ang mipirma sa payroll mao si Granada.

Nabalaka si Baquerfo nga mosumbalik kaniya ug siya unya’y makasuhan og malversation of public funds kun iyahang aprubahan ang payroll sa mga kawani sa lungsod nga pirmado ni Granada. - Chester Abadilla uban sa report ni Darrrel Carumba (BANAT NEWS)