Gipusil kaduha sa agtang namatay

CEBU, Philippines – Patay diha diha ang usa ka batan-ong mag-uuma human gidul-it pagpusil sa ulo makaduha ka higayon samtang nagpahuway sa lingkoranan sulod sa basketball court sa bukirang bahin sa barangay Tubod lungsod sa Sibonga niadtong Biyernes sa alas 3:30 sa hapon.

Ang biktima nga wala na madala pa sa tambalanan mao si Jesus Paller Montefalcon, 22, molupyo sa sitio Blanco sakop sa nahisgutang barangay samtang walay nakaila sa mga saksi sa usa ka hamtong nga lalaking nagtaptap sa nawong nga mipusil kang Montefalcon.

Matud ni SPO4 Rodilito Carillo sa Sibonga police dihang nahinabi sa Banat News sa sayo pa nagdula og basketball ang biktima ug pagkahuman mipahuway sa lingkuranan daplin sa basketball court.

Wala magdugay, kalit lang nisulod ang suspek nga nagtaptap daan sa nawong og senina dayon diretso og bunot sa giluklok nga armas ug gidul-itan pagpusil sa agtang ang biktima duha ka higayun.

Ang suspek human mahagba ang biktima dali usab nga milakaw gawas sa basketball court ug wala na maabti sa mirespondeng awtoridad pinangulohan ni SPO3 Ramon Padilla.

Ang kapolisan naka-recover og usa ka deformed slug sa kalibre .45 ingon man duha ka basiyo sa kalibre .45.

Ang kapulisan padayun pang nag-imbestigar pagtumbok sa suspek ug sa motibo sa krimen ug kagahapong adlawa nibalik sa crime scene ang mga imbestigador aron paghipos og dugang ebidensiya. – Darrel Carumba (BANAT NEWS)