CEBU, Philippines – Nahimong dugoon ang kapistahan sa dakbayan sa Mandaue karong tuiga human ang usa ka negosyanteng namista kuyog sa iyang pamilya ang namatay ug napatay usab ang giingong iyang gikaaway.
Ang maong namistang napatay mao si Faustino Dibdib, 40, taga barangay Obong, Dalaguete, samtang namatay usab ang iyang gikaaway nga si Riclen Gulven Camay, 17, nga taga barangay Looc, dakbayan sa Mandaue.
Si SPO2 Danilo Ibarita sa Presinto 5 sa Opao Police Station nga nahinabi sa Banat News miingon nga paingon na untang mopauli ang pamilya ni Dibdib gikan nga namista sa panimalay sa ilang higala sa barangay Cambaro.
Nagsakay ang grupo sa Isuzu Elf nga gimaneho ni Urbano Cortes Dibdib, 41, lumolupyo gihapon sa Dalaguete kauban ang iyang asawa nga si Maria Lourdes Dibdib, 42, mga anak nga pulos pa minor de edad ug ang pipila sa ilang mga silingan nga kuyog usab nilang namista.
Apan pag-abot diha sa eskina Plaridel ug Catalino Ouano nahunong ang trak gumikan sa kadaghan sa mga sakyanan diha sa maong dapit apan kalit lang misaka si Camay ug mga barkada diha sa trak ug misunod na dayon ang karambola.
Wala pa usab maestablisar sa kapolisan kung giunsa pagkahitabo nga nagkarambola dayon sa sulod sa trak sanglit walay nakasulti kung si kinsay miuna og panakit sa isig ka habig.
Si Dibdib ug mga kauban diha sa trak nakalitan sa pagsaka ni Camay ug daling mipunit sa kutsilyong ilang gidala-dala ug gihansakan sa dughan apan giingong misukol si Camay ug nailog ang hinagiban ug gisumbalik og dunggab kang Dibdib.
Sumala pa sa pasiunang imbestigasyon sa kapolisan nasaypan si Dibdib ug ang mga kaubanan nga sakop sila sa Alpha Kappa Rho (Akrho) fraternity.
Gikatahong dunay usa sa mga kauban ni Dibdib diha sa trak ang giingong misenyas nga susama sa senyas sa Akrho diha sa pundok nila ni Camay.
Samtang gisusi pa kung sakop ba og laing fraternity ang pundok ni Camay apan sa alegasyon sa iyang grupo, giingong dunay insidenteng nahitabo pipila na ka adlaw ang nakalabay nga gibato sila sa mga gidudahang sakop sa Akrho.
Apan ang kapolisan mihimakak nga duna silay naalarmahang susamang insidente diha sa maong dapit sa milabay’ng mga adlaw.
Si SPO2 Ibarita miingon nga gidala si Dibdib sa Mandaue City District Hospital apan gideklarar kining dead on arrival samtang si Camay nga gidala usab sa Cortes General Hospital sa mao gihapong dakbayan gideklarar usab nga dead on arrival.
Ang Banat News misuway pagtawag sa telepono sa director sa Mandaue City Police Office nga si Sr. Supt. Orlando Ualat kabahin sa seguridad sa kapistahan ni Senior San Jose kagahapon apan walay motubag sa telepono niini. – BANAT NEWS