CEBU, Philippines – Patay dihadiha ang usa ka foreman human gipusil makadaghang higayon sa anak sa iyang giuyab-uyab samtang kini nagdakop sa iyang manok binuhian duol sa ilang bunkhouse niadtong miaging adlaw sa barangay Kinawahan sa lungsod sa San Remegio.
Ang biktima giilang si Leonides Cuezon, 41, foreman sa Venrey Construction Company ug lumad nga taga Pinamungahan, samtang ang suspek giilang si Ralph Retuya, taga barangay Busogon sa naasoy’ng lungsod.
Gitumbok sa kapolisan ang motibo sa pagpamusil mao ang giingong pakiglambigit sa biktima sa inahan sa suspek.
Si Insp. Rolly Lauron, hepe sa San Remegio Police station dihang nahinabi sa Banat News nagkanayon nga dunay gitrabahong taytayan ang kumpanya sa biktima diha sa barangay Kinawahan ug Busogon. Matud ni Lauron nga niadtong higayona maoy katapusang adlaw sa ilang pagtrabaho sa maong taytayan ug samtang nanghipos sa manok binuhian kalit mibutho ang suspek ug gipusil ang biktima sa ulo, buko-buko ug nilapos ang bala sa dughan ug duna pay laing samad pinusilan sa palad ug lawas nga maoy nakaingon sa hinanali niining kamatayon.
Matud pa ni Lauron nga sa wala pa nahitabo ang maong pagpamusil nianang kaadlawon giingong nasakpan sa suspek ang biktima ug ang iyang inahan sulod sa usa ka payag.
“Nasakpan man kuno to pagka-kaadlawon sa anak, mao to gahapon gi-postingan na gyud to daan ang biktima,” matud pang Lauron. Dili pa usab nila mapasaka ang kasong pagpatay kay ang pamilya sa biktima wala pa mopatim-aw sa ilang buhatan sanglit giuna pa sa pagpahiluna ang patay’ng lawas sa biktima. - Rey Pasaporte (BANAT NEWS)