Mga valedictorian sa Mandaue gipatrabaho

CEBU, Philippines – Mokabat sa 26 ka mga valedictorian sa high school sa dakbayan sa Mandaue kinsa migradwar karong tuig, nakapahimulos sa summer job program sa kagamhanan sa maong dakbayan.

Gihatagan sila og higayong makatrabaho sulod sa 22 ka adlaw ug makadawat sila og suweldo nga P5,800.

Sa maong suholan, 60 porsiyento niini maoy pas-anon sa kagamhanan sa dakbayan samtang ang 40 porsiyento abagahon sa Department of Labor and Employment (DOLE-7).

Nagtakda usab og adlaw ang maong mga tinun-an nga gipasulod og trabaho sa dakbayan nga mobisita sa buhatan ni Mayor Jonas Cortes isip courtesy call.

Si Cortes sa iyang bahin nagkanayon nga gusto usab niya nga makabatang ang maong mga tinun-an sa mga kalihokan sa dakbayan nga may labot sa pagpahiuli sa kalihokan.

Kini bisan pa kon motungha na sila sa kolehiyo ug mokuha na og kurso. - Romeo T. Limpangog (BANAT NEWS)