Lalaki gipusil patay sa nagmotorsiklo

CEBU, Philippines – Namatay ang usa ka 35-anyos nga lalaki human pusila sa duha ka wala hiilhing tawo didto sa South Gate Subdivision, barangay Bulacao, dakbayan sa Talisay, kagahapon sa buntag.

Ang biktima giila sa mga polis nga si Genaro Casino, 37, nga taga Bulacao, samtang ang mipusil kaniya mao ang duha ka tawong wala hiilhi nga nagsakay og motorsiklo.

Tulo ka mga samad pinusilan ang nakita sa lawas sa biktima nga naglakip sa iyang walang pulso sa kamot, walang abaga ug walang bahin sa lawas. Sila si SPO3 Joel Wenceslao ug PO2 Lino Diez uban sa mga Field Training Program Police maoy miresponde sa maong alarma kinsa miingon nga usa ka bata kinsa nakasaksi sa maong hitabo misugilon kanila nga ang mga kriminal nag-atang nang daan sa biktima diha sa lugar nga nahitaboan.

Si Casino naglakaw paingon sa gate sa subdivision dihang kalit lang kining gipusil sa duha ka lalaki sa walay igong hinungdan. Ang biktima ang nakadagan pa human maigo nangayo og panabang sa mga silingan apan nahagba kini sa yuta ug nakabsan sa kinabuhi.

Sa pagkatumba sa biktima dali usab nga mibiya ang mga kriminal gikan sa maong lugar.

Si PO2 Diez mibutyag sa Banat News sa dakong kalagmitan nga atraso sa biktima ngadto sa mga kriminal ang hinungdan sa maong pagpamusil. Nakuha sa mga polis gikan sa lugar nga nahitaboan ang tulo ka kabhang sa bala sa 9MM pistol. - Brenda D. Batuto (BANAT NEWS)