City officials gihagit og forum

CEBU, Philippines – Si Kongresista Pablo John Garcia sa ikatulong distrito sa lalawigan mipadayag nga andam mohatag sa konseho sa siyudad sa kopya sa dokumento kabahin sa Joint Venture Agreement tali sa Taguig City ug R-11 Builders. Apan kini kung desidido niini ang dakbayan ug kinahanglang buhaton kini sa usa ka panagtigom ug sa presensya sa mga opisyales.

Nasayran si Konsehal Hilario Davide III nangayo og kopya sa kongresista ug gusto kining makigkita aron tan-awon ug itandi ang Joint Venture Agreement tali sa siyudad ug Filinvest Land Incorporated alang sa pag-develop sa luna diha sa South Road Properties (SRP).

“My reply to Davide, Sure, I’ll give you a copy. And I have a better idea. Let’s meet at a forum where I will give my copy,” matud pang Garcia sa gipadala niining text message sa The Freeman.

Sa sayo pa, si Garcia nagkanayon nga ang kagamhanan sa Taguig wala na mogasto og salapi alang sa pagpa-develop sa maong proyekto, apan dako gihapon ang gihatag nga share sa revenue kun itandi sa kasabutan sa Cebu City ug sa Filinvest nga 10 porsiyento ray share sa revenue sa ma-develop nga luna.

Ang Filinvest ug ang kagamhanan sa siyudad nagpinirmahay og usa ka kontrata nga gilangkoban sa 50.6 ektaryang luna diha sa SRP.

Sa privilege speech didto sa Kongreso niadtong Abril 20, si Garcia nitandi sa Cebu City-FLI joint venture contract ug sa Taguig City-R-II Builders Agreement. Matud sa kongresista ang FLI nakabentaha sa maong kasabutan kay 10 porsiyento ra mapunta sa siyudad nga kung buot susihon 40 ngadto sa 50 porsiyento unta ang share nga madawat sa Sugbu.

Pinaagi sa usa ka forum, si Garcia nagkanayon nga matuki unta ang matag baruganan sa isig ka habig sa Cebu City ug sa Filinvest Joint Venture.

“Let’s not call it a debate. Let’s have a real, sensible discussion,” nagkanayon ang kongresista. Ang siyudad ni-award sa FLI sa joint venture contract aron maoy mo-develop sa 50.6 ektaryang luna sa SRP. -Rey Pasaporte (BANAT NEWS)