CEBU, Philippines – Kapin sa P130 mil nga kwarta ang nahanaw sa usa ka negosyanteng Koreano human unaya og tulis sa iyang kanhi trabahanteng iyahang gitaktak sa Chuson Galbi Korean Restaurant sa Salinas Drive Lahug pasado alas 9 sa buntag kagahapon.
Si Chang Nam Lim, 60, taga barangay Apas, tag-iya sa nahisgutang lugar mitug-an sa kapolisan nga gitionan siya sa iyang kanhi kitchen helper nga si Medjohn Bernabe, 26, molupyo sa San Vicente, Lahug.
Matud pa ni Police Inspector Romeo Cubo, Cebu City Police Office Theft and Robbery Section sa pakighinabi sa Banat News nga nakadawat silag tawag gikan sa maong restaurant nga adunay nahitabong pagpanion ug pagpanulis hinungdan nga ila kining gidali og adto apan wala na nila naabti ang gikatahong tulisan.
Base sa gisaysay sa biktima ang suspetsado midiretso og sulod sa maong restaurant ug nangayo sa iyang separation fee apan ang duha wala magkasinabot.
Ang suspek gikatahong kalit nga mibunot og wala matinong armas (pusil) ug gitionan siya niini sa ulo ug gidiretso pangayo ang iyang pitaka ug kwarta sa kaha nga halin sa ilang restaurant.
Sa bahin usab ni SPO2 Ulyssis Ragasa sa TRS, sa pakighinabi sa Banat News nagkanayon nga walay bisan usa sa nakasaksi nga nakapugong sa maong panghitabo tungod sa kahadlok nga sila tiunan tungod kay nagtuo silang dunay laing kauban ang suspetsado.
Ang kapolisan padayon pang nagpahigayon og hot pursuit operation batok sa suspetsdado nga dali kaayong nakaipsot sa maong lugar. -Lesley Caminade (BANAT NEWS)