Dinamitero gipangita

CEBU, Philippines – Walay nahimo ang mga sakop sa Bantay Dagat sa lungsod sa Cordova paggukod sa usa ka mananagat nga taga barangay Tanke, dakbayan sa Talisay nga gipasanginlang migamit og dinamita sa iyang pagpangisda ngadto sa ilang kadagatan tungod kay mas paspas pa ang pumpboat niini sa mga awtoridad.

Padayon pang gipangita si Renato Labuca, residente sa barangay Tanke, Talisay kinsa nakaikyas apan gikatakdang pasakaan og kaso.

Ang pumpboat nga gisakyan ni Labuca nga gipanag-iya sa amahan niining si Loreto, 54, residente usab sa maong barangay ang gikumpiska ug gidala sa mga polis sa Cordova.

Ang suspetsado nga wala masakpi gikatahong gitabangan og gukod sa Bantay Dagat sa dakbayan sa Sugbo pinangulohan ni retired colonel Cesar Enriquez ug Bantay Dagat sa Cordova nga gipangulohan ni Eduardo Macbudbod uban sa mga polis sa Cordova Police Station nga sila si PO2 Alex Noron ug PO1 Ryan Casibon.

Ang grupo mi-coordinate nalang sa Talisay City Police Station sa paggukod sa suspetsadong dinamitero.

Gikataho nga si Renato ang nanero og mga isda diha sa Cordova hinungdan nga gigukod kini sa mga awtoridad. - Brenda Batuto (BANAT NEWS)