Dumpit mi-leave taliwala sa kaso

CEBU, Philippines – Miduso og lima ka adlaw’ng mandatory leave ang kontrobersyal nga polis nga si SPO1 Adonis Dumpit sa Cebu City Police Office kagahapong adlawa.

Si Dumpit miklaro hinuon sa media nga wala kini kalambigitan sa kasong murder nga gipasangil kaniya kalabot sa pagkapusil patay niya kang Ronron Go, usa ka gipasanginlang tulisan niadtong 2004.

Matud pa ni Dumpit ang iyang pag-leave may labot kini sa iyang adlaw’ng natawhan karong Mayo 13 ning buwana.

Hinuon iyang gi-angkon nga bisan paman kun wala siya maapektuhi sa maong kaso ug nagpadayon sa iyang trabaho apan lahi ra gayud alang kaniya kun wala untay lain siyang gihuna-huna.

Giangkon niini nga aduna siya nabatyagan nga gamay ka kiwaw sa iyang trabaho apan wala niya kini igsapayan tungod kay ang mga kaso kaluha nang daan sa ilang pagpanumpa isip usa ka police.

Giklaro niini nga kun ugaling ibasura ang motion for re-investigation sa iyang kasong murder nga giduso sa iyang mga abogado sa sala ni Judge Genorosa Labra sa Regional Trial Court branch 23 ug malutsan sa warrant of arrest andam siyang motahan ug magpaposas sa iyang mga kamot.

Apan miapelar siyang daan sa ubang units kun maoy makagunit sa warrant of arrest nga pahibaw-on gyud siyang daan aron dili mahitabo ang mis-encounter nilang mga police.

Masaligon hinuon siya nga makalingkawas sa maong kaso kini tungod kay dunay mga dagkong kaso nga mas grabe pa sa iyang nahiaguman nga nakalingkawas niini ug subling mibarog nga legitimate operation ang ilang gihimo dihang iyang napusilan si Go. - Guam Logroño (BANAT NEWS)