Tiguwang gipusil patay

CEBU, Philippines – Patay diha-diha ang usa ka tigulang human kini gipareglahan ug gipusil sulod sa duha ka higayon samtang naglakaw sa dalan paingon na untang mopauli sa sitio Caduldolan barangay Lutac siyudad sa Naga sa may alas 8:30 sa niaging gabii.

Ang biktima mao si Feliciano Canonigo, 60, ug molupyo ra sa nahisgutang lugar samtang ang suspek wala pa gyud mailhi sa kapulisan sa paghimo ning balita.

Matud ni PO2 Ken Cabrera sa Naga City police dihang nahinabi sa Banat News naglakaw kini sa dalan niadtong higayuna dihang kalit lang mipaka ang duha ka lanog nga buto sa armas.

Paglabay sa pipila ka minutos nahagba na ang biktima sa yuta ug nakaangkon og duha ka samad pinusilan sa walang bahin sa dughan ug laing samad pinusilan sa walang paa niini nga maoy nakaingon sa iyang hinanaling kamatayon.

Ang anak lalaki sa biktima maoy nakadiskubre sa patay’ng lawas sa amahan nga nag-ubo na sa dalan nianang pagka alas 6:00 sa buntag samtang paingon unta kini sa trabaho.

Ang kapulisan walay nakuhang bisan unsang ebidensya sa crime scene. Hinuon padayon pa ang imbestigasyon pagtumbok sa suspek ug sa motibo sa kremin. – BANAT NEWS