6-anyos napusilan sa nanghasing ex-convict

CEBU, Philippines – Usa ka giingong ex-convict nga nanghasi ang nakapusil og 6- anyos nga batang lalaking nahinanok og katulog sa lantay nga kawayan gawas sa ilang balay sa sitio San Roque barangay Kawit lungsod sa Medillen kagahapon sa alas 12:22 sa sayong kaadlawon.

Ang biktima mao si Renil Godinez Orbeso, 6, molupyo ra sa nahisgutang lugar samtang ang suspek nga nakapusil kaniya giila lang sa pangalang “Legnoy Montano,” molupyo sa sitio Mina barangay Dalinding.

Matud ni SPO2 Alfredo Limalima sa Medillen police dihang nahinabi sa Banat News, nasuko ang suspek human kini makadawat og balitang siya maoy gipasanginlang “manghingiay” og isda diha sa ilang dapit.

Sumala pa sa kapolisan midiretso pagsinggit ang suspek sa pag-ingon “Kinsay nagbaligya sa akong ngalan diri sa San Roque nga mangayo og isda kay hutdon tamo og patay.”

Matud sa mga nakasaksi human sa pagsinggit-singgit sa suspek mibunot kini og pistola sa iyang hawakan ug dayun mipabuto apan aksidenteng naigo ang biktima nga natulog sa lantay niadtong higayuna.

Ang bata naigo diha sa ubos nga bahin sa tuong hawakan ug gidali pagtabang sa mga silingan ug kabanay ug gihatud sa Severo Verallo District Hospital sa siyudad sa Bogo apan gibalhin dayon sa tambalanan dinhi sa siyudad sa Sugbo tungod sa ka-seryoso sa kahimtang niini. Samtang ang suspek pagkahibalong nakaigo kini og bata gikatahong naratol ug nagdali-dali’g pahilayo sa lugar ug wala na maabti sa mirespondeng kapolisan.

Matud pa ni SPO2 Limalima ang suspek dili pa kaayo dugay’ng nakagawas gikan sa Muntinlupa apan sa paghimo ning balita wala pa nila matino kun unsa ang kaso niini. - Darrel Carumba (BANAT NEWS)