Balaudnon vs. gangs suportado

CEBU, Philippines - Gisuportahan ni provincial board member Juan Bolo ang balaudnon sa Ubos Balay Balaoranan nga nag-criminalized sa street gangs ug magsilot niadtong motukod niini.

Nagkanayon si Bolo nga ang House Bill 5827 nga gitawag og "Criminal Street Gang Deterrence and Punishment Act of 2009," naglatid nga mahimong mabilanggo sulod sa 15 hangtud sa 30 ka tuig ang miyembro sa mga gangs nga masakpang maglaroylaroy sa kadalanan.

Sa resolusyon ni Bolo kabahin sa maong balaudnon nga gipangamahanan ni Rep. Rufus Rodriguez sa Cagayan de Oro, pahatamtangan pa og mas bug-at nga silot ang mga big boss, leader o founder sa maong mga gangs ilabina kun kini maoy mopasiugda sa krimen.

Si Bolo nagkanayon nagtuo siyang mao kini ang magsulbad sa ubay-ubay'ng linuog nga krimen binuhatan sa mga gangs sama sa nahitabo sa usa ka grade 6 dropout nga babayeng gitabangan og lugos ug gidunggab sa 60 ka higayon sa kaubang miyembro sa dakbayan sa Lapulapu.

Sigon pa ni Bolo nga kung mahingpit na kining balaud dili na magproblema ang kapolisan kung unsay ipasakang kaso batok sa mga miyembro.

Nagtuo usab ang bokal nga ang maong balaudnon kun mapasar ug mahimong balaud hayan maundang na ang mga recruitment diha sa mga eskuylahan.

Nanghinaot lamang si Bolo nga malakip sa maong balaudnon ang pagpasaka og kaso niadtong mga minor de edad nga miyembro sa gang ug nalambigit na sa paghimo og krimen. – BANAT NEWS