CEBU, Philippines - Nalandig sa tambalanan ang usa ka tricycle driver human sa away nila ni Manny “Pacman” Pacquiao ug Ricky “The Hitman” Hatton kagahapong adlawa, ang maong lalaki gikatahong giatake sa sakit sa kasing-kasing.
Giila sa kapulisan ang nalandig sa tambalanan mao si Gregorio Alingalan, 56, taga sitio Tabtoy, barangay Tuyan, Naga kinsa gikan sa South General Hospital gibalhin sa Vicente Sotto Memorial Medical Center (VSMMC).
Si SPO1 Elmer Optima sa Naga Police Station nga gikahinabi sa Banat News nagkanayon nga naglisod sa pag-ginhawa si Alingalan dihang migawas sa Sports Complex human sa away.
Hinungdan nga gidali siya sa pagdala sa iyang mga kabanay ug mga higala sa maong tambalanan apan nakadesider ang pamilyang ibalhin kini sa VSMMC.
Usa ka wala magpailang nurse on-duty sa VSMMC nga gikahinabi sa Banat News mitug-an nga mga alas 5:00 pasado kagahapon sa hapon nga stable na ang kahimtang ni Alingalan.
Si Rosalinda Cañoneo, maguwang ni Alingalan nga gikahinabi sa Banat News nikumpirmar nga naguol gyud ang iyang manghod nga wala makapusta kang Pacquiao kagahapong adlawa.
Matud pa niini nga silang tanan sa ilang lugar ug mga igsoon mga dumadapig ni Pacquiao apan wala lang gyud nila mahatagi’g para ipusta si Alingalan sanglit panggasolina ra sa traysikol ang ilang natunol tungod kay naapiki sila sa kwarta human siya maospital usab dili palang dugay.
Hinuon ang iyang igsuon hatagan unta'g pang pusta sa iyang anak nga babaye apan mibalibad kini tungod usab kay mao pay paggawas ni Rosalinda sa tambalanan.
Ang iyang manghod (Alingalan) nananghid nga moadto gyud sa Naga Sports Complex aron motan-aw sa away ni Pacquiao ug mao nalay iyang nahibaw-an nga gikaguol niini nga wala makapusta tungod kay mudaog unta kini.
Dugang pa niini nga niadto pa silang mopusta gyud bisan gamay lang kang Manny Pacquiao tungod kay salig kayo sila nga makadaog gyud ang gibansagang “pambansang kamao.” – BANAT NEWS