Seguridad sa pag-abli sa klase angayang sugdan

CEBU, Philippines – Gipahinumduman ni Cebu City Acting Mayor Michael Rama ang kapulisan sa dakbayan nga mangandam na alang sa umaabot nga pagbukas sa klase karong sunod buwan.

Namatikdang ubay-ubay nang mga estudyante gikan sa ubang mga dapit ang namalik ug duna pay gipaabot nga mangabot dinhi sa siyudad aron pagtungha sa kolehiyo

Dili gusto si Rama nga makadungog og taho nga dunay mga tinun-an gikan sa kasikbit nga mga lalawigan nga mabiktima sa mga badlungon sa katilingban.

Kini sama sa pagpanulis, pagpanguot, pagpanglabni ug uban pang krimen nga giingong nahitabo gihapon karon dinhi sa dakbayan. Buot sa acting mayor nga kanunay mapahinumduman ang kapulisan aron kanunay usab kining motamod sa ilang katungdanan.

“Most of the time ako gyud nang gibalik-balik pagpahinumdum sa atong mga polis nga dili moundang sa pagpreparar para nga walay mabiktima,” sumala ni Rama.

Lakip sa gipahinumduman sa acting mayor nga mangandam, mao ang publikong mga tunghaan sa dakbayan ilabi na sa natad sa ilang seguridad. Una na hinuong gipasalig ni Cebu City Schools Division Superintendent Doctor Lorna Rances nga plantsado na ang security measures nga ilang ipatuman sa sunod tuig-tingtungha.  - Elly Bolonos (BANAT NEWS)