93-anyos nga lolo gipusposan sa anak

CEBU, Philippines – Nabuak ang ulo sa usa ka 93-anyos nga lalaki human bunali og dos-por-dos nga kahoy sa iyang 70-anyos na usab nga anak nga babaye niadtong Biyernes sa buntag sa sitio Kadataan, barangay Fortaliza lungsod sa Tuburan.

Ang namatay giila sa kapulisan nga si Aurelio Aparicio, 93, samtang ang gitudlong mipatay kaniya mao ang iyang kaugalingong anak nga si Margarita Aparicio, 73, dalaga.

Si SPO3 Lino Delos Santos sa Tuburan Police Station nga gikahinabi sa Banat News nagkanayon nga ang amahan nga si Aurelio ug ang suspek mao ray nahibilin sa ilang panimalay gumikan kay ang iyang ubang mga anak didto sa ilang umahan.

Apan nianang pagka-alas onse sa buntag usa sa mga anak niining miuli nakurat nalang nga nagkadugo ang ulo sa ilang amahan sulod sa ilang panimalay.

Nagduda silang ang ilang igsuong si Margarita maoy ilang gidudahang mihimo niini gumikan kay mao kini ang tigpakaon sa ilang amahang naglubog.

Gikatahong ang suspetsadong anak nga gihulagway nilang duna nay deperensya sa pangisip didto ra magbarog-barog sa karsada atbang sa ilang panimalay human sa krimen.

Dihang ilang gipangutana gikatahong miangkon kini dayong maoy mipatay sa iyang amahan.

Matud pa sa kapolisan libog kaayong kaestorya ang akusado gumikan kay magsulod ug gawas sa mga pangutana ug dili usab motuldo sa mga pangutana.

Apan bisan paman sa katiguwangon ug deperensya sa pangisip niini gitanggong gihapon ang akusado ug kasong parricide ang gikatakdang ipasaka karong Lunes. - Guam Logroño (BANAT NEWS)