Pito ka tawo na-trapped apan naluwas Dakong sunog sa leon kilat

CEBU, Philippines – Gibana-banang mokabat sa P8.1 milyones ang danyos sa nahitabong sunog niadtong miaging gabii diha sa dalan Leon Kilat ning dakbayan sa Sugbu.

Ang naugdaw mao ang duha ka andana nga Cebu United Investors Incorporated Building nga gipanag-iya ni SPO1 Efren Quinan nga giabangan usab sa pipila ka mga magpapatigayon.

Lakip sa mga occupants mao ang SL Pension House, SL Pawnshop, Ken’s Lodge, JF Furnishing, Pebusa Marketing, Cecile Marketing, lakip na ang bodega sa Silawan’s Furnishing.

Nasuta sa pasiunang pakisusi ni fire investigator SFO1 Roy Maratas nga ang kayo nagsugod sa luyong bahin sa Ken’s Lodge ug daling nakatabok sa kasikbit nga mga balay patigayon.

Samtang nakaangkon usab og kadaut ang ikapito nga andana sa Gaisano Capital South ug ang ikatulo, ikaupat ug ikalima nga andana sa Gotianuy Building sa University of Cebu (UC).

Alas 9:02 niadtong miaging gabii nadawat sa Cebu City Fire Department ang alarma ug nakontrolar sa kabumberohan ang sunog sulod sa usa ka oras ug walo ka minutos.

Lakip sa nitubag sa nahisgutang alarma mao ang kabumberohan gikan sa mga dakbayan sa Talisay, Mandaue ug Lapulapu ug ang Chinese Brigade Volunteer.

Kini human usab ipaubos ang nahisgutang sunog sa Task Force Alpha kon 4th alarm tungod usab sa kasikbit niining dagko nga mga establisamento.

Nagtuo si SPO1 Quinan nga gituyo pagsunog ang iyang building sa usa sa iyang mga tenants nga iyang gipapahawa tungod kay giingong wala na makabayad sa abangan.

Nagdumili hinuon paghingalan ang polis sa suspetsado apan ang maong posibilidad wala isalikway ni City Fire Marshall Superintendent Ismael Codilla.

Sa pagsuwat ning balita padayon pa nga mipahigayon og imbestigasyon ang kabumberohan sa dakbayan pagtino sa hinungdan sa nahisgutang sunog.

Usa ka Randy Atis, 19 anyos, usa ka stay-in worker sa Costumers Choice Eatery ang nasamdan sa tuong tiil dihang iyang gisikaran ang pultahan sa usa ka establisamento nga dunay pito ka mga tawong natanggong.

Matud pa ni Atis sa pakighinabi sa Banat News nga sa dihang nakabantay na siya sa sunog dali siyang migawas apan nakadungog siya nga aduna pay nagsiyagit sa Cecile Enterprises hinungdan dali niyang gisikaran ang pultahan.

Si Tina Empliyalis,18, usa sa mga kawani sa mga anak sa tag-iya sa Cecile Enterprises nga gikahinabi sa Banat News nagkanayon nga siya ug ang iyang agalong si Warliza Neñez ug iyang mga anak nga nagpangidaron og 15, 14, 13, ug 5, nakagawas lang dihang gisikaran ni Atis ang pultahan.

Nagpasalamat ni Empliyalis kang Atis tungod kay nagtuo silang kung wala pa niini sikari ang pultahan hayan naapil sila og kasunog sanglit dugay kaayo silang nakaabli sa pultahan ug dako na kaayo ang kalayo.

Ang tag-iya sa Customers Choice Eatery nga si Raymund Glinigo,22, sa pakighinabi sa Banat News mibutyag nga ang kalayo nagsugod sa 2nd floor sa SL Lodge.

Si Cebu City Fire Marshall Ismael Codilla nagkanayon sa dihang nahinabi sa Banat News nga wala pa nila nasuta kun diin gyud magsugod ang kalayo ug kun unsay hinungdan niini. - Uban sa report ni Lesley Caminade (BANAT NEWS)