Roxas mosuporta kang Lozada

CEBU, Philippines – Misuporta si Liberal Party President Senador Manuel “Mar” Roxas kangRodulfo “Jun” Lozada kinsa gipadakop sa mga otoridad niadtong Miyerkules tungod sa kasong perjury.

Gitataw ni Roxas nga iyang paluyohan si Lozada tungod sa kaisog niini sa pagbarug sa kamatuoran ilabi na sa kontrobersyal nga ZTE-NBN deal.

Matud pa ni Roxas nga ang kaisog ni Lozada sa pagyagyag sa kamatuoran pinaagi sa paglambigit niya kang first gentleman Jose Miguel Arroyo, ang kapikas ni Presidente Gloria Macapagal Arroyo sa kahiwian sa ZTE-NBN deal usa ka bayanihong buhat.

Ang misang-at og kasong perjury batok kang Lozada mao si kanhi Secretary Mike Defensor. Matud ni Roxas nga nabulhog na ang hustisya karon ubos sa pamunoan ni Presidente Arroyo pinaagi sa pagtabon-tabon sa mga dagkong kaso nga gikalambigitan sa mga suod niini. - Rey Pasaporte (BANAT NEWS)