Swine flu way klarong sakit sa baboy

CEBU, Philippines – Ang World Health Organization (WHO) mipahibawo kagahapon nga walay igong kamatuoran nga kining giingong   ‘swine flu’ gikan gyud sa karne sa baboy.

Busa mi-awhag ang mga kadagkoan sa WHO nga imbis swine flu, himoon nang H1N1 influenza A’ ang ngalan niining sakita, matud pa ni Dick Thompson, ang tigpamaba sa WHO.

Ang tinuod matud pa ni Thompson, kining sakita, sakit nga gikan sa usa ka tawo nga dali kaayong motakboy ngadto sa laing tawo ug gumikan sa kagrabi sa maong sakit , wala pay nadiskorehang tambal nga makaayo niini karon.

Miingon si Thompson nga gumikan sa terminolohiyang swine flu, kalit kaayong misukarap ang industriya sa baboy sa nagkalain-laing nasud sa kalibotan, kay dili na mahalin ang ilang produktong karne sa pagtuo sa kadaghanan nga gikan gyud sa baboy ang maong sakit.

Matud pa ni Thompson nga gumikan sa kasagmuyo sa mga negosyante og karne sa Egypt, miihaw sila og 300,000 ka baboy sa miaging adlaw ug gipakita nila sa tibuok kalibotan nga dili gikan sa baboy ang maong sakit kay wala may nangamatay sa mga mikaon sa maong karne didto sa Egypt.

Busa miingon siya nga imbis swine flu, kinahanglang H1N1 influenza A, mao nay angay nga itawag niini. – BANAT NEWS