Call center agent gikawatag P200 mil

CEBU, Philippines – Mokabat sa P200,000 nga kantidad sa mga alahas ug salapi ang nawagtang gikan sa lawak sa usa ka call center agent human lungkaba sa mga akyat bahay gang ang apartment nga iyang gipuy-an sa sitio Sangi, New Road, dakbayan sa Lapulapu sa miaging kaadlawon.

Ang biktima mao si Mary Ann Mangubat,   23, dalaga ug call center agent sa barangay Banilad, dakbayan sa Mandaue, ug nagpuyo sa apartment nga nahimutang sa Sangi.

Si PO1 Melquiadez   Batomalaque sa theft and robbery section sa maong Lapulapu Police Station nga nahinabi sa Banat News miingon nga igo nalang sa pagtibi ang biktima dihang pag-abot niya sa iyang lawak mipasad na sa sawog ang iyang mga kabtangan.

May pagtuo ang biktima nga gipugos og abli sa mga kawatan ang pultahan sa iyang lawak ug dihang nakasulod na kini, gikuyat-ag ang iyang mga butang sulod sa aparador ug gisakiyo ang iyang kuwarta ug mga alahas nga naglakip sa kuwentas nga bulawan, singsing nga bulawan, bracelet ug uban pa. - Romeo T. Limpangog (BANAT NEWS)