CEBU, Philippines – Duha ka suspetsadong tulisan kinsa mitulis sa mga pasahero sa usa ka PUJ niadtong Huwebes sa gabii didto sa sitio Kalmar, barangay Lawaan III, dakbayan sa Talisay nadakpan sa kapolisan.
Ang mga suspetsado mao sila si Renante Anero, 37, ug Joy Panghus, 21, pulos taga Lawaan III.
Samtang ang mga biktima mao sila si Eunice Cindy Mausisa, 18, taga Tunghaan , Minglanilla ug Sampaguita Ricabo, 18, taga Pooc, dakbayan sa Talisay.
Si PO1 Jundave David, ug PO2 Roelito Tano, sa Talisay City Police Station maoy nakadawat og tawag gikan sa mga biktima hinungdan nga miresponde dayon sila.
Si David mibutyag sa Banat News kagahapon nga ang mga biktima nagsakay og PUJ nga paingon ngadto sa Minglanilla gikan sa Tabunok, diin gikasakay usab nila ang duha ka mga suspek.
Dihang sa pag-abot nila sa barangay Lawaan III kalit lang milanit sa ilang mga kutsilyo ang mga suspek ug dayon mideklarar nga tulis.
Gumikan sa kabalaka sa ilang kinabuhi wala nalang moreklamo ang mga biktima sa pagtunol ngadto sa mga tulisan sa ilang mga cell phone, pitaka nga may sulod nga kuwarta, mga alahas ug uban pang butang nila.
Human makuha ang ilang mga butang nanganaog dayon ang mga tulisan ug nanglakaw kini paingon ngadto sa kalibonan sa Kalmar.
Matud ni PO1 David nga naabtan gyud nila sa akto sila si Anero ug Panghus sa sulod sa balay nga gipuy-an niini nga nagbahig pa sa mga butang nga ilang nakuha gikan sa ilang mga nabiktima.
Wala kini makareklamo dihang ila kining gipamosasan ug gidala sa prisohan, samtang nagpaabot sila karon sa kiha nga ipasaka sa mga biktima ngadto sa mga suspek. - Brenda D. Batuto (BANAT NEWS)