CEBU, Philippines – Dismayado ang labaw sa Cebu Provincial Fire Department tungod sa gihimo karong lakang sa nagdumala sa Cebu City Fire Department nga naglaraw nga mobuwag na sa hurisdiksyon sa Cebu Provincial Bureau of Fire Protection.
Si Cebu City Fire Marshall Superintendent Esmael Codilla nagtinguhang mabuwag sa maong buhatan pinaagi sa pag-establisar og Cebu City Fire District sama sa gihimo sa dakbayan sa Davao ug sa uban pang highly urbanized city sa nasod.
Ang konseho sa dakbayan mirekomendar na alang sa katukuran sa kaugalingong Fire District subay usab sa giduso nga resolusyon ni Konsehal Augustus Pe Jr.
Matud pa ni Pe, si Codilla maoy nihangyo kaniyang suportahan ang maong tinguha ug nagtoo usab ang konsehal nga mas epektibo pa unya ang serbisyo sa kabomberuhan sa dakbayan kung kini magkaugalingon na.
Apan nagkanayon si Provincial Fire Marshall Chief Inspector Victor Vibares nga wala mopahibawo kaniya si Codilla sa plano niini.
“Wala man siya magpahibawo nako sa iyang mga plano nga under pa man unta sila sa probinsya, not even a single paper nga iyang gihatag para makahibawo ta,” sumala ni Vibares.
Kung susihon og maayo ang posisyon sa maong duha ka opisyal sa kabomberuhan mas labaw pa og ranggo si Codilla kun itandi kang Vibares, apan dinhi lang sa Sugbu nahitabo nga ang usa ka Fire Superintendent ubos sa pagmando sa usa ka Fire Chief Inspector.
Apan gipangatarungan ni Vibares nga dili niya kasaypanan ang maong sitwasyon tungod kay walay modawat sa posisyon nga iyang gihuptan.
Taliwa sa iyang kadismaya gipadayag hinuon ni Vibares nga siya dili supak nga mabuwag ang kabomberuhan sa dakbayan gikan sa probinsya.
Apan nidugang siyang mas angayang unahon sa paghatag og pagtagad ni Codilla mao ang pagdugang sa ilang mga kahimanan tungod kay giingong nagkagamay ang mga fire trucks sa siyudad samtang nagkadako usab ang ilang responsibilidad.
“Sa una dihang ako pay nagdala sa Cebu City Fire Department duna mi 20 ka mga fire trucks karon murag pila na lang nang magamit,” matud pa ni Vibares. - Elly Bolonos (BANAT NEWS)