CEBU, Philippines – Giawhag ni Provincial Board member Victor Maambong ang Commission on Higher Education kon CHED nga monitoron ang tanang mga kolehiyo ug unibersidad nga mopasaka sa miscellaneous fees agi og pagbawi sa nabaraw nga tuition fee increase ning pagbukas sa klase.
Sumala pa ni Maambong nga nakadawat siya og report nga ang management sa nagkadaiyang tulonghaan ilabina dinhi sa dakbayan sa Sugbu ang nangita og paagi nga makabawi sa ilang dugang galastuhan tungod sa epekto sa global financial crisis karon nga miigo sa nasud sa Pilipinas.
Apan gitataw ni Maambong nga tungod sa moratorium nga gimando ni Presidente Gloria Arroyo sa tuition fee increase karong tingbukas sa klase, ang mga tulunghaan adto mohapak sa ilang increase sa mga miscellaneous fees.
Kini aron makabayad sa dugang galastuhan sa school paper, library, internet, computer usage, aircondition ug uban pang mga galastohanan sa eskuylahan.
Si Maambong nagkanayon nga kun ang maong report tinuod, makapaduda kini sa kasensiro sa mga tulunghaan nga mipahibalong dili nila patas-an ang tuition fee.
Ang mga tunghaan sa Sugbu partikular na ang mga unibersidad mipahibalong di sila mopasaka sa tuition fee ug ang uban mihatag pa og discount sa rason nga matabangan ang mga ginikanan nga makapadayon pagpatungha sa ilang mga anak gumikan sa krisis karon.
Dugang pa ni Maambong diha sa iyang napasar nga resolusyon nga angayan nga mohimo og dinaliang lakang ang CHED aron mapugngan pa ang dili maayong lakang sa mga kolehiyo ug mga unibersidad dinhi sa rehiyon. – BANAT NEWS