'Prince Harry' milarga na, ingon sa polis

CEBU, Philippines – Milarga na kagahapong adlawa biya didto sa lungsod sa Dumanjug ang nabalita nga si Prince Harry sa Britanya nga una nang nabalita nga nagpahigayon og civic works sama sa pagpamintal sa publikong tunghaan sa maong lungsod kauban ang mga batan-on nga mga Tagalog.

Mao kini gibutyag sa hepe sa Dumanjug Police Station nga si Insp. Ricardo Nayni   human personal kining mibisita ug nakigkita sa mga kadagkuan sa Dumanjug Central School kagahapong adlawa.

Matud ni Insp. Nayni sa dihang nahinabi sa Banat News nga iyang nasayran sa iyang pagpakighinabi gikan sa prinsipal sa maong tunghaan nga si Menerva Sozobrado nga tungod sa maong napublikar nga balita milarga na si Prince Harry kauban ang mga Tagalog nga nagpahigayon og pagpamintal sa ilang tunghaan nga wala matiwas ang ilang gitrabaho.

Matud ni Insp. Nayni buntag pa kagahapong adlawa gisulti kaniya sa prinsipal ang paggikan sa langyaw ug mga kaubanan pagbiya sa ilang lugar. Apan matud ni Insp. Nayni wala gyud mokonpirmar kaniya ug labaw nang wala sab gyud moprangka ang prinsipal kun mao ba gyud kadto si Prince Harry.

Giangkon ni Insp. Nayni nga medyo tensyonado gyud ang maong lugar sa milabay’ng adlaw human gidugok kini sa daghang mga tawo gikan sa dakbayan sa Sugbo ug sikbit nga mga lugar nga nagpanon nga nagpakisayod kang Prince Harry ug gusto nga makakuha og litrato didto sa Dumanjug Central School.

Kini maoy hinungdan nga gipalig-on nila ang seguridad sa maong tunghaan ug gani mitanyag pa sila og mga polis nga mobantay sa palibot apan mibalibad ang mga magtutudlo ug prinsipal hinungdan nga nagpahigayon na lang sila og 24 oras nga pagpatrolya ug didto na lang nila gipa-estambay ang mga polis 100 metros gikan sa maong tunghaan.

Gitug-an ni Insp. Nayni nga medyo mibalik na sa normal ang kahimtang sa maong tunghaan kagahapong adlawa human usab gipanabi sa mga magtutudlo nga milarga na ang maong gikataho nga prinsipe sa Britanya.

Hinuon kulang og pagtuo si Insp. Nayni nga mao gyud kadto si Prince Harry tungod kay gawas nga ordinaryo ra kaayo kini sa dihang mipahigayon og courtesy call sa buhatan sa mayor ug sa buhatan nila sa kapolisan wala pa gyud kini mga gwardiya nga nag-uban uban. - Darrel A. Carumba (BANAT NEWS)