Badlongong Polis Gikulata

CEBU, Philippines – Nabun-og ang usa ka polis human kini gitabangan og kulata ug gi-embargohan pa sa iyang motorsiklo ug service firearm sa sitio Lacaron, barangay Pitalo lungsod sa San Fernando niadtong Martes sa alas 8:00 sa buntag.

Ang biktima nga igo na lang midangop sa kapolisan sa lungsod sa San Fernando mao si PO1 Dave Agcol, 32, minyo, molupyo sa Inayagan siyudad sa Naga ug nadestino sa PSSG sa Cebu Police Provincial Office (CPPO).

Si Agcol dunay nag-ungot nga kasong administratiba sa PNP ug usa sa mga girekomendar sa Cebu Provincial Police Office nga tangtangon sa rooster niini gumikan sa mga nahimong kahiwian.

Samtang ang mga suspek nga maoy mitabang og kulata kaniya mao ang magsuong sila si Peter ug Joel Abaquita, pulos molupyo sa Langtad, Naga.

Matud ni SPO2 Joel Nebrija sa San Fernando Police sa dihang nahinabi sa Banat News, si Agcol miadto kini sa maong lugar aron apason ang milayas nilang katabang nga si Jack Morales nga gipasanginlan niining nangawat og cellphone sa iyang asawa.

Apan pag-abot niya sa maong lugar nabaligya na diay ang maong cellphone ngadto sa usa ka gihinganlan og Emma, apan sa wala hisayring hinungdan gikatahong miabot ang duha ka suspek ug kalit giduol ang biktima ug gitabangan og kulata.

Ang maong polis nakaangkon og daghang mga bun-og ug pangos sa nagkadaiyang bahin sa lawas.

Human siya kulataha, wala pa gyud matagbaw ang mga suspek ilang gikuha ang kalibre .45 nga service firearm niini lakip na ang iyang motorsiklo nga Yamaha Crypton ug maoy gigamit pagsibat pahilayo sa lugar.

Walay nahimo ang biktima ug nidangop na lang kini sa kapolisan aron mangayo og tabang ug aron ipa-blotter ang maong panghitabo.

Sa paghimo ning balita padayon pang gi-imbestigar ni SPO1 Francisco Salubre ang maong panghitabo ug gipangita pa sab aron dakpon ug pasakaan og kaso ang magsuon nga suspek.

Ang OIC sa CPPO, Supt. Erson Digal mibutyag nga positibo kaniadto sa random drug test si Agcol apan makapila na himoa ang hearing wala kini tungha-tungha maong girekomendar niya kini sa Police Regional Office 7 nga taktakon. – BANAT NEWS