Bana naghikog tungod sa kalisod sa kinabuhi

CEBU, Philippines – Usa ka 38-anyos nga lalaki ang giingong naghikog tungod sa kaguol nga wala nay ikabuhi sa iyang pamilya diha sa sitio Ambakon, barangay Pungtod lungsod sa Oslob niadtong Miyerkules sa alas 9:30 sa gabii.

Patay nang nakit-an sa iyang asawa sulod sa ilang payag mao si Joel Labago, 38, lumad nga taga Perpetual Village-8, Jabay, Cavite ug kasamtangang nanimuyo sa maong lugar. Matud pa ni PO2 Nelson Mendaros dihang nahinabi sa Banat News nangaon pa ang pamilya sa pinuy-anan sa iyang babayeng ugangan nga si Erlinda Berco.

Apan human sa panihapon nananghid kining mogawas aron magpahayahay apan paglabay sa pipila ka mga oras wala na kini mobalik hinungdan nga gipangita sa iyang asawa nga si Joan Labago.

Diha na siya hikit-i sa asawa sulod sa ilang payag tupad ra usab sa pinuy-anan sa ilang ginikanan nga nagbitay na nga dunay higot nga nylon sa liog ug nagdiwalwal na ang dila.

Dali unta kining gitabang sa asawa ug giputol dayun ang nylon nga naghigot sa liog ug gihatod dayun sa Oslob Disrict hospital apan gideklarar sa mga doktor nga dead on arrival. - Darrel Carumba (BANAT NEWS)