CEBU, Philippines – Gitinguha sa kagamhanan sa siyudad sa Sugbu nga mamugna ang Barangay Help Desk (BHD) sa kabarangayan sa dakbayan nga mamahimong dangpanan sa mga molupyo partikular na niadtong nangita ug gustong makasulod og trabaho.
Matud pa ni Konsehal Eduardo “Edu” Rama nga kinahanglang matukod na ang BHD sa kabarangayan tungod sa nagkadaghang nangita og trabaho taliwa sa nasinating krisis dili lang dinhi sa nasod kun dili sa tibuok kalibutan.
Nagkanayon si Rama nga ang BHD mao unya ang mangita og job vacancies ug mao usab ang mopahibawo niini ngadto sa mga residente.
“Mag-inquire sila sa mga kompanya diha sa ilang barangay sa mga bakanteng trabaho unya ang BHD pud maoy mo-accommodate sa mga mulopyo,” sumala ni Rama
Ang konsehal nga maoy chairman sa Committee on Labor sa City Council miingon nga nangita na sila og pundo alang sa katukuran sa BHD sa matag barangay.
Sa pikas bahin, ang BHD mao usab unya ang duolon sa mga tinugyanan sa Department of Manpower Development and Placement (DMDP) kun dunay bakanteng trabaho ug kurso nga ilang gitudlo.
Ang DMDP nagtanyag karon og dul-an sa 20 ka nagkadaiyang mga kurso sama sa Culinary Arts, Computer Literacy and Programming, Cosmetology, Electronics, Computer Technician, samtang ang Flower Arrangement ug Soap and Candle Making na lang hinuon ang giingong bakante pa niining higayuna. - Elly Bolonos (BANAT NEWS)