CEBU, Philippines – Wala matandog si Cebu City Assistant City Prosecutor Mary Ann Castro sa lakang ni Press Secretary Cerge Remonde nga papahawaon kini sa buhatan sa Bureau of Immigration and Deportation-7.
Matud pa ni Castro nga wala siya'y mahimo kun si Justice Secretary Raul Gonzales na ang momando kaniya sa pagbiya sa buhatan sa BID-7 ug mobalik sa Office of the City Prosecutor.
Bisan pa nga mabalik siya sa piskaliya, matud ni Castro nga magpadayon gihapon ang walo ka kaso nga gipasaka batok nila ni BID-7 Regional Director Casimiro Madarang III ug Fernando San Ramon, ang immigration supervisor sa MCIA.
Samtang si Madarang usab sa iyang bahin nalipay sa aksiyon nga gihimo ni Sec. Remonde og naglaum kini nga mahatagan og igong pagtagad ni Sec. Gonzales ang mga gihimong kalapasan og pagpang-harras ni Castro sa buhatan sa BID-7.
Bugtong lamang tuyo ni Madarang nga mawagtang si Castro sa BID-7 ug magmalinawon na sila sa ilang operasyon sanglit kaniadto napuno kini sa kakuyaw kun si Castro na ang moduol kanila diin magbilin kini og hulga kung dili matuman ang iyang kagustuhan.
Naglaum usab si Madarang ug San Ramon nga sa mga kasong ilang gipasaka usab sa Ombudsman batok ni Castro masilotan usab kini base sa mga ebidensiya nga ilang gisumiter.
Si Castro gi-detail lamang sa DOJ sa BID-7 aron sa pag-asister sa mga kasong administratiba sa maong buhatan ug bag-o lang usab kining gitudlo nga maoy hepe sa Board of Special Inquiry sa maong buhatan.
Pipila ka bulan ang milabay mitumaw ang panagbangi nila ni Castro ug sa mga dagkong opisyal sa BID-7 human gi-akusahan ni Madarang si Castro nga nangayo og P20 mil nga bahin sa mga overtime services sa mga immigration officer nga nagserbisyo sa tugpahanan sa MCIA. Apan ang maong alegasyon hugot nga gipanghimakak ni Castro. - Bong Soriano (BANAT NEWS)