Ulitawo nalumos sa dagat

CEBU, Philippines – Patay nang nakit-an nga naglutaw sa dagat ang usa ka 36 anyos nga lalaki kinsa nalumos sa dagat didto sa barangay Catarman ,lungsod sa Liloan niadtong Martes sa buntag. 

Ang gidagsa sa baybayon nga wala nay gininhawa nailhan nga si Roy Barrosa, 36 , ulitawo, nga taga Catarman.

Ang namatay giingong wala nay senina ug karsones ug brief nalang maoy nahibilin sa lawas niini. Si PO2 Routchil Jugalbot sa Liloan Police Station mibutyag sa Banat News nga ang nangaligo sa usa ka beach resort sa maong lugar maoy unang nakadiskobre sa patay’ng lawas ni Barrosa .

Si Apolonia Barrosa, ang inahan sa biktima, mitug-an sa kapolisan nga ang katapusang higayon nga iyang nakit-an ug nahinabi ang iyang anak didto sa ilang balay niadto rang Domingo sa gabii.

Human niadto wala na mahiuli sa ilang balay ang iyang anak ug nakurat nalang siya dihang nabalitaan niyang patay na kini - Darrel A. Carumba (BANAT NEWS)