Drayber nakatulog patay ang nadasmagan

CEBU, Philippines – Namatay ang usa ka motorista human kini hibangga-i sa usa ka taxi nga gimaneho sa usa ka giingong nakatulog nga drayber didto sa Pier 4 pasado alas 6:00 kagahapon sa buntag.

Ang biktima nagpabiling wala hiilhi sa kapolisan hangtod ning pagbalita, samtang ang suspetsadong drayber sa taxi , nailhan nga si Liberato Saavedra, 51, drayber sa Ken taxi nga adunay plate number GXD 834, nga taga Guindarohan, barangay Tungkop ,lungsod sa Minglanilla.

Sa imbestigasyon sa taga City Traffic Operation and Management (CITOM) nasuta nga ang duruha pulos nagpaingon sa Plaza Independencia sa dihang kalit lang nga gisungag sa taxi ang gisakyang motorsiklo sa biktima nga adunay plate number nga 4998 GB.

Tungod sa kakusog nga pagkadumbol, nalagpot ang drayber sa motorsiklo ngadto sa windshield sa taxi ug ang pagtugpa niini sa sementadong karsada maoy hinungdan sa dihadiha niyang kamatayon

Si Saavedra mibutyag sa Banat News nga wala niya hibantayi nga nakabangga siya og tawo kay nahinanok siya sa pagkatulog samtang nagpadagan sa iyang sakyanan.

Iyang giangkon nga wala gyud siya’y tulog sukad niadtong miaging adlaw tungod kay nangiyawat siya nga mokita og dako .

Samtang si Manuel Tagaan sa CITOM nagkanayon nga ila pang gipaabot nga kuhaon sa tagtungod ang biktima ug makapasaka dayon og kiha batok sa suspetsado kinsa anaa karon sa mabugnaw nga prisohan sa kapolisan. - Lesley Caminade (BANAT NEWS)