Swine flu virus wa pay na-imbintong tambal

CEBU, Philippines – Wala pay nakit-ang tambal nga makaayo sa sakit nga human swine flu virus nga nakapatay na og kapin 150 ka tawo sa nasud sa Mexico. Si Regional Director sa Department of Health Dr. Susana Madarieta mibutyag nga gitun-an pa ang maong klase sa virus ug gibana-banang molanat pa kini og unom ka buwan una pa mogawas ang tambal batok niini.

Pahimangno pa ni Madarieta nga magmatngon ang publiko ug maglikay nga dili matakdan sa maong sakit, sama sa kanunay'ng pagpanghugas sa mga kamot ug likayan ang physical contact ilabi na niadtong mga tawo nga gikan sa Mexico ug Estados Unidos.

Giklaro hinuon ni Madarieta nga mahimo gihapong mokaon og karneng baboy ang katawhan basta matarong lang og luto.

“Confirmed na gyud ni nila (US,Mexico) nga bag-o ning klaseha sa virus unya mao na nga nay parties karon nga nangita’g paagi paghimo na sab og vaccine, pero dili ta kasalig nga nay vaccine kay ang vaccine ani, mga six months to a year pa,” matud pang Madarieta dihang na-interview sa DyDD kagahapon.

Giawhag ni Madarieta ang katawhan kung dunay mataptan sa maong sakit kinahanglan dad-on sa labing duol nga health center o hospital.

Gumikan sa kabalakang pagkatap niini, gimando ni Bureau of Immigration Commissioner Marcelino Libanan sa tanang mga tugpahanan ug mga dungoanan sa nasud nga dili na pasudlon sa nasud ang nataptan niini.

Sa memorandum nga giluwatan ni Libanan niadtong Abril 27 sa tanang Immigration Officers sa mga tugpahanan nga makigtambayayong sa Bureau of Quarantine.

Matud pa sa kamandoan ni Libanan, kun ang usa ka langyaw makonpirmar sa BOQ nga nataptan sa maong sakit dili na kini dawaton nga makasulod ug pabalikon dayon kung diing nasud siya gikan. Kagahapon sa mga alas 11:40 sa udto miabot ang 333 ka mga pasahero sa Cathay Pacific flight CX 921 gikan sa Hongkong nga may mga sakay nga gikan pa sa Estados Unidos ug uban pang kanasuran ang miabot sa Mactan Cebu International Airport.

Matud pa ni Dr. Terence Bermejo sa BOQ-7 wala pa silay na-hold nga pasaherong mas taas pa sa normal nga 37 degrees Celsius nga kainiton sa lawas kon temperature.

Kahinumduman nga miabot na sa kapin 150 ka mga tawo sa Mexico ang namatay sa maong strain ug duna nay mga nataptan sa mga nasud sa Canada, Estados Unidos ug may mga suspected cases na usab nga gi-report sa South Korea, Israel, Great Britain ug Espanya.

Si Konsehal Arsenio Pacaña sa dakbayan sa Sugbu nanawagan sa health authorities nga higpitan pa gyud ang monitoring aron magpabiling swine flu free ang Pilipinas. “Protihian natong dili mawagtang ang mga turista at the same time mopatuman sab ta og mga measures kay what is money if the virus will engulf sa atong nasod,” matud ni Pacaña.  - Rey Pasaporte uban sa report nila ni Bong Soriano ug Elly Bolonos (BANAT NEWS)