CEBU, Philippines – Nalungag ang ulo human gipusil patay sa iyang kauban ang usa ka baker sulod sa ilang gitrabahoan taliwala sa ilang init nga panaglalis didto sa barangay Tabok, siyudad sa Danao niadtong Lunes sa ala 1 sa kaadlawon.
Ang biktima mao si Jonard Villacuatro Bacang, 17, ulitawo, molupyo sa Sitio Tak-an, barangay Tabok siyudad sa Danao ug baker sa Gilrose bakeshop nga gipanag-iya ni Gilna Bontuyan.
Samtang ang suspek mao ang usa ka Elmer Enriquez, hingkod ang panuigon, molupyo sa barangay Ogis sakop sa nahisgutang siyudad ug kauban sa trabaho sa biktima.
Matud ni SPO4 Edgar Gomez sa Danao City Police Station dihang nahinabi sa Banat News subay sa blotter nga gibasehan niini ang biktima ug suspek nagkalalis sa wala pa ang hitabo sulod sa ilang trabahoan ug napukaw ang ilang karaan nga panag-away.
Matud pa wala makaagwanta ang suspek sa tanto nilang panaglalis, nibunot kini sa pistola nga wala matino ang kalibre nga gitakin sa iyang hawakan ug dayon gipusil nga dul-it ang biktima sa walang aping ug milapos ang bala sa luyong bahin sa ulo ug patay kini dihadiha.
Ang suspek kusog kaayong nakadagan paingon sa gawas bitbit ang armas niini pagsibat pahilayo ug wala na kini maabti sa miresponde nga mga polis. - Darrel A. Carumba (BANAT NEWS)