Dumpit gikasuha'g murder

CEBU, Philippines – Gipasakaan og kasong murder ang kontrobersyal nga polis sa Cebu City Police Office nga si SPO1 Adonis Dumpit kalabot sa pagpatay sa usa ka gipasanginlang tulisan upat na ka tuig ang nakalabay diha sa barangay Tejero.

Ang Office of the Ombudsman for the Military mipasaka og kaso kang Dumpit tungod sa kamatayon ni Ronron Go niadtong Disyembre 14, 2004 sa sitio Sampaguita sa Villagonzalo II sa barangay Tejero.

Si Dumpit uban sa duha ka mga polis nga sila si PO3 Ruel Hortellano ug PO3 Porferio Gabuya gikatahong nag-follow-up sa usa ka insidente sa pagpanulis sa lugar tungod sa reklamo sa inahan sa usa sa mga nabiktima.

Si Go nga silingan ni Dumpit maoy gitumbok sa biktima sa tulis maong ilaha kining gipangita apan sumala pa sa mga testigos pagkakita ni Go kang Dumpit midagan kini apan gikatahong gipusil kini ni Dumpit, si Go sumala pa sa autopsy report sa National Bureau of Investigation naigo sa likod duha ka higayon nga nakaingon sa kamatayon niini.

Apan si Dumpit mirason kaniadto nga self-defense ang iyang gihimo, usa ka Elizabeth Corro, inahan sa nabiktima sa pagpanulis nga si Kimberly maoy nangayo kaniya og tabang.

Matud pa ni Dumpit miadto siya sa balay ni Go apan wala kini didto apan sa iyaha nang pag-uli usa ka Jimmy Mendiola ang misenyas kaniyang may grupo sa mga lalaking tulisan nga may mga armas nga padulong sa panimalay sa usa ka ginganlan og Pepe Regis.

Hinungdan nga iyahang gisusi ang maong grupo, apan usa sa grupo nga giila niyang si Junjun Gador pagkakita kaniya giingong kalit nga mipusil kang Dumpit hinungdan nga mitago ang naulahi ug sa pag-return fire na niya gikatahong nagtion na usab kaniya og armas si Go hinungdan nga iyaha kining gipusil.

Matud pang Dumpit siya mismo ang personal nga midala kang Go sa tambalanan.

Apan ang Office of the Ombudsman for the Military misalikway sa pangangkon ni Dumpit. Si Graft Investigator ug Prosecution Officer Anafe Manlapaz nagkanayon nga ang pamahayag sa mga testigo mitakdo sa autopsy report.

Dugang pa niini nga negatibo usab ang paraffin test sa mga kamot ni Go. Ang maong buhatan nakakita og probable cause nga kasuhan si Dumpit apan mipakawalay sala nila ni Gabuya ug Hortellano gumikan sa kakulang sa ebidensya.

Walay piyansang gitakda ang Ombudsman kang Dumpit. - Fred Languido gikan sa The Freeman