Tiguwang ug polis nga may kaso 'ilisda'g batan-on'

CEBU, Philippines – Hulipan na og mga batan-ong polis ang mga kaubang edaran na ug dunay mga kasong giatubang nga maoy gitahasang mobantay sa seguridad sa kampo sa Cebu Provincial Police Office.

Kini maoy gipatuman nga kamanduan ni Supt. Erson Digal ang officer in-charge (OIC) sa CPPO aron mas mapahugtan ug mapalig-on pa ang seguridad sa perimeter sa kampo sa CPPO.

Matud pa ni Digal nga siya mismo nakakita sa ka haguka sa mga edarang polis nga nagbantay sa gate nga dili na epektibo sa ilang trabaho.Samtang alang kaniya bati usab kaayong tan-awon sa publiko nga kadtong mga police nga badlungon nga padayon pa nilang gi-imbestigar sa ilang tagsa-tagsa ka violations mao puy makit-ang nagbantay sa kampo.Matud pa niini, nga angayan ang mga tiguwang nga polis ug kadtong dunay mga kaso magpabilin nalang diha sa holding area sa headquarters ug dili na pabantayon.

Gani atol sa iyang pag-inspection kagahapon sa buntag ang police nga nagbantay sa main gate walay armas, kini gihulagway ni Digal nga usa ka matang sa kahaguka na sa mga gwardiya sa main gate.

Matud pa niya nga ang mag-gwardiyang police nga madestino sa mga kampo ilabi na sa mga main gate o entrances kinahanglang magdala-dala gyud unta og tag-as nga armas sama sa Armalite.

Nunot niini, gimanduan niya si Supt. Renato Malazarte ang Camp Commander sa pagpangita’g mga batan-ong police nga makabantay sa headquarters sa CPPO ug did-an na ang mga tiguwang police sa pagbantay.

Si Malazarte sa iyang bahin mibutyag sa mga sakop sa media nga upat ngadto na sa unom ka mga batan-ong police ang ibutang sa main gate sa kampo. - Guam Logroño) (BANAT NEWS)