...karneng baboy sa Sugbu luwas gihapon

CEBU, Philippines – Gisalikway ni Cebu City Veterinarian Doctor Alice Utlang ang kabalaka sa mga Sugbuanon labot sa gikahadlukang sakit nga swine flu virus. Ang swine flu usa ka mananakod nga matang sa acute respiratory disease nga sagad makita sa mga baboy apan mahimong motakboy usab sa tawo.

Apan matud pa ni Utlang nga wala pay kaso sa swine flu ang nasod ilabi na sa Sugbu hinungdan nga dili angayang kabalak-an ang maong sakit.

“Wala man tay kaso sa swine flu, wala may sakit ang atong mga baboy ana, so, dili ta angayang maguol, dili ta makuyawan nga matakdan ta ana,” sumala ni Utlang.

Nabalaka karon ang ubang kanasuran sa tibuok kalibutan nga naglakip sa Pilipinas tungod sa pagkatap sa sakit nga swine flu sa nasud sa Mexico nga mikalas na og 100 ka tawo ug daghan pa ang na-hospital.

Si Dr. Susana Maderieta, regional director sa DOH 7 mibutyag nga gi-monitor nila karon ang mga kaso nga may pagkapareha sa sintomas sa maong sakit sama sa taas kaayong magbalik-balik nga hilanat ug grabeng pag-ubo.

Ang maong sakit miabot na sa New York City, sa Kansas, sa California, sa Texas, New Mexico ug Ohio sa Estados Unidos.

Gikataho hinuong mamatay ra ang swine flu virus apan angayang tarungon pagluto ang paliton nga karne sa kamerkaduhan, samtang ang paghugas sa mga kamot ug pagpalayo sa masakiton aron di matakdan.

Sa iyang bahin nagtoo ang chairman sa Cebu Market Vendors Development Cooperative (Cemvedco), Erwin Goc-ong, nga dili maapektahan sa swine flu scare ang mga baligyang karne sa kamerkaduhan sa dakbayan ilabi na diha sa Carbon Public Market.

Kini tungod kay giingong nasayod na ang mga pumapalit nga lokal nga mga karne ang gipamaligya dinhi sa siyudad ug dili inangkat gikan sa gawas sa nasod.

Gawas niini, miingon si Goc-ong nga dili usab mamalit og frozen nga karne ang mga konsumidor nga anha mangumpra sa mga satellite market sa siyudad. - Elly Bolonos uban sa report ni Romeo Limpangog) (BANAT NEWS)