Habalhabal driver, kapuyo patay

CEBU, Philippines – Namatay ang usa ka habal-habal driver ingon man ang iyang kapuyo nga sakay niya human ang motorsiklo nabangga sa naghaguros nga Ceres bus niadtong alas 8:30 sa Domingo sa gabii didto sa barangay Pasil, lungsod sa Santander.

Ang namatay paglabay sa pipila ka minuto didto sa Oslob District Hospital giila sa kapolisan nga si Godofredo Omaya, 36, taga barangay Cabutongan sa nahisgutang lungsod human makaangkon og grabeng kadaot sa iyang ulo.

Samtang kagahapon sa alas 12 sa udto nakabsan usab sa iyang kinabuhi ang kapuyo niining si Lydia Rondera, 39, sa usa sa mga tambalanan dinhi sa dakbayan sa Sugbo gumikan usab sa grabeng kadaot sa iyang ulo ingon man baba niini.

Si SPO1 Manuel Regulacion sa Santander Police Station nga gikahinabi sa Banat News miila sa drayber nga si Leopoldo Papna, 42, taga San Jose Quezon, Bukidnon nagmaneho sa Ceres Bus nga may plakang GWY-620.

Matud pa ni SPO1 Regulacion nga ang Ceres Bus nga gimaneho ni Papna gikan sa dakbayan sa Sugbu paingon   ngadto sa Bato, Samboan sa dihang gikasungag niini ang motorsiklo nga 7CDD1850 habal-habal nga gimaneho ni Omaya sa dihang naabot sa duha ka crossing sa barangay Pasil.

Sumala pa niini nga ang drayber sa habal-habal nga si Omaya uban sa iyang kapuyo nga si Rondera gikan sa barangay Liptong nga nag-inom sa iyang mga kaubang habal-habal driver.

Gikataho nga kusog kaayong nakapadagan si Omaya sa habal-habal padulong sa ilang pagpauli apan kalit lang kining mi-left turn sa dihang naabot sa nahisgutang lugar hinungdan nga   gikasungag niini ang atubangang bahin sa Ceres hinungdan nga nangalukot ang mga biktima.Si Omaya nadali sa pagdala sa hospital sa Oslob apan paglabay sa 20 minutos nabugtuan sa iyang kinabuhi samtang ang kapuyo niining si Rondera gidali pagdala sa Vicente Sotto Memorial Medical Center apan nakabsan usab sa iyang kinabuhi kagahapon sa udto.

Hinuon matud pa ni SPO1 Regulacion nga hayan buhian ang drayber nga gitanggong tungod sa kawalay interes mopasakag kaso sa mga kabanay sa mga namatay samtang ang   kompaniya sa Ceres Bus andam mo-abaga sa gastuhan ingon man pagtabang sa pamilya sa mga nangamatay.- Guam Logroño (BANAT NEWS)