Aktor Nasamdan Sa Kadaugan Sa Mactan

CEBU, Philippines – Bisan pa og nasamdan na ang singer ug aktor nga si Gino Padilla atol sa iyang pagdala sa papel ni Ferdinand Magellan sa "Kadaugan sa Mactan" kagahapon sa reenactment apan giisip kini niya nga usa ka tinud-anay nga kinabuhi ang pasundayag.

Atol sa maong reenactment si Magellan nga gidala ni Padilla nakigharong ni Lapulapu nga gidala usab ni Joko Diaz subling gipakita ngadto sa katawhan ang makasaysayanong away niini sa dihang buot sakopon ni Magellan ang isla sa Mactan niadtong Abril 27 tuig 1521 diin uban sa asawa ni Lapulapu nga si Reyna Bulakna nga gidala sa papel ni Maureen Larazabal wala kini mosanong sa hangyo ni Magellan hinungdan nga natigayon ang sangka sa duha ka habig.

Atol sa maong away natinuod pagkaigo makaduha ka higayon si Padilla sa mga pinote sa duha ka sakop ni Lapulapu hinungdan nga kini nasamdan. Apan wala   panumbalinga ni Padilla ang mga samad.

Miangkon si Padilla nga bisan siya gisakitan sa maong hitabo, apan nangayo usab kini og pasaylo sa duha ka sakop ni Lapulapu nga iya usab gitinuod og patid atol sa away.

Dakong garbo usab ni Padilla nga sa usa ka makasaysayanong hitabo usa siya sa napili nga moapil sa pasundayag ug nalipay siya nga sa dapit sa nahitabuan sa kamatayon ni Magellan siya maoy napilian nga modala sa papel ni Magellan.

Atol sa   Kadaugan sa Mactan gihulagway kini ni Mayor Arturo Radaza nga nagmalampuson bisan pa sa kagamay sa ilang gigahin alang niini apan buhong usab sa suporta sa mga tag-iya sa mga hotels, resort ug restaurant sa dakbayan sa Lapulapu ilabi na sa matag gabii nga kalihukan sulod sa walo ka adlaw nga selebrasyon.

Ang Kadaugan sa Mactan gitambungan nila ni Consul Enrique Benidicto   sa nasud sa Belgium, Tourism Usec. Penias Alburo, mga kadagkuan sa Philippine Air Force pinangulohan sa ilang Tactical Operations Commander nga si Air Force Maj. Gen. Nathaniel Legaspi ug ang PAF-MBEAB Base Commander nga si Brig. Gen. Edgardo Mendoza.

Lakip sa mitambong si writer-director Carlo J. Caparas uban sa iyang asawa nga lumad sa dakbayan sa Lapulapu ug gipasidunggan kagahapon atol sa Kadaugan sa Mactan human kini mapili sa Tourism Commission nga maoy Garbo sa Lapulapu 2009 nga gihatag ni   Radaza gumikan sa iyang mga maayong binuhatan nga nagdala usab og dungog sa dakbayan sa Lapulapu. – BANAT NEWS