Comelec way mahimo batok political ads

CEBU, Philippines - Giangkon ni Cebu City North District Election Officer Atty. Marchel Sarno nga walay mahimo ang Comelec sa nanggawas karon nga mga political ads.

Partikular na niini ang mga advertisement sa gitawag og mga presidentiables nga makita diha sa nagkadaiyang telebisyon ug madungog sa mga sibyaanan.

Matud ni Sarno nga base sa bag-ong balaud, dili makonsiderar nga premature campaigning ang gihimo sa pipila ka mga politiko.

Kini tungod kay giingong nalatid sa balaud nga maisip lang ang usa ka politiko nga siya usa ka kandidato, unya na atol sa pagsugod sa campaign period.

Gani matud ni Sarno nga sa maong balaud, mahimo gihapong makakampanya ang usa ka kandidato bisan kung kini nakaduso na sa iyang certifiko de kandidatura.

Lakip hinuon si Sarno sa nakasaway sa mga politiko, nga mipagawas na og mga advertisement sa nagkadaiyang Media outlet.

Nag-una sa mga presidentiables nga daghan na og mga political ads niining panahuna mao sila si Senador Manny Villar ug Mar Roxas.

Nasayran nga ang Parish Pastoral Council for Responsible Voting (PPCRV) mikuwestiyon na karon sa nanggawas nga mga political ads.

Kini tungod sa pagduda niini nga gigamit sa maong mga politiko ang kwarta sa katawhan alang sa ilang personal nga interes gawas nga layo pa ang umaabot nga eleksyon. - Elly Bolonos (BANAT NEWS)